Naxçıvan Muxtar Respublikasının səhiyyə naziri Samiq Sadıxov Kəngərli Rayon İcra Hakimiyyətinin inzibati binasında vətəndaş qəbulu keçirib. 

Qəbuldan əvvəl səhiyyə naziri Samiq Sadıxov və Kəngərli Rayon İcra Hakimiyyətinin başçısı Kamal Ələkbərov ümummilli lider Heydər Əliyevin Kəngərli Rayon İcra Hakimiyyətinin qarşısında yerləşən büstü önünə gül dəstələri qoyaraq onun əziz xatirəsini yad ediblər.

Qəbulda Səhiyyə Nazirliyinin struktur bölmə rəhbərləri də iştirak ediblər. Müraciətlər əsasən müayinə və müalicə, dərman təminatı, əlillik məsələləri və işlə bağlı problemləri əhatə edib.

Naxçıvan Muxtar Respublikasının səhiyyə naziri Samiq Sadıxov vətəndaşların təklif və suallarını diqqətlə dinləyib, problemlərin həlli istiqamətində lazımi tapşırıqlar verib. Eyni zamanda, bəzi müraciətlərin aidiyyəti qurumlara yönləndirilməsi təmin olunub.